Í starfsmannaviðmóti Gegnis er veittur aðgangur að þjóðskrá til að flýta fyrir skráningu lánþega. Í því felst að allir sem hafa íslenska kennitölu og eru búsettir á Íslandi eru í skránni. Þjóðskráin í Gegni er uppfærð einu sinni í mánuði. Mánaðarlegar uppfærslur ná til breytts lögheimilis og breytts nafns. Einnig er fært til bókar ef nafn er máð úr þjóðskrá, t.d. vegna andláts en hvíli skuld á lánþeganum eða hafi hann safngögn í útláni er nafnið ekki tekið út í Gegni, heldur boðum komið til safnsins um að innheimta eða fella niður skuldina og útlánið.
Fyrir kemur að tilkynningar um breytt heimilisfang eða nafn berast seint til þjóðskrár og þar af leiðandi berast þær upplýsingar að sama skapi seint til Gegnis. Við slíkum seinkunum er lítið að gera, en í meginatriðum endurspeglar lánþegaskrá Gegnis þjóðskrána eins og hún er á hverjum tíma en með um það bil eins mánaðar töf.