Skýringar við mánaðarlega tölfræði

Mánaðarleg tölfræði

Mánaðarleg tölfræði Gegnis gefur upplýsingar um lykiltölur í Gegni eftir mánuðum fyrir hvert og eitt aðildarsafn Gegnis og einnig fyrir kerfið sem heild. Hægt er að sjá útlánatölur fyrir söfnin allt frá opnun Gegnis 19. maí 2003 til síðustu mánaðamóta hverju sinni. Talning eintaka og titla er frá nóvember 2004 og talning lánþega frá byrjun árs 2005. Það er mjög breytilegt hvenær aðildarsöfn Gegnis hafa tengst kerfinu og einnig hvenær útlán hófust.

Fyrir einstök söfn er mögulegt að sjá fjölda eintaka, titla og lánþega í lok hvers mánaðar ásamt útlánum þess mánaðar. Fyrir kerfið sem heild er boðið upp á heildarfjölda útlána, titla og eintaka.

Athugið að nýjar tölur fyrir mánaðarlegu tölfræðina eru birtar á vefnum um 5. hvers mánaðar.

Heildarfjöldi titla og eintaka

Tölurnar sýna fjölda titla (mældur sem heildarfjöldi færslna) og eintaka (mældur sem samanlagður eintakafjöldi) eins og hann er við lok hvers mánaðar.

Frá og með janúar 2006 varð sú breyting gerð að fjöldi titla var ekki lengur mældur sem heildarfjöldi færslna, heldur var talan takmörkuð við gildar bókfræðifærslur. Ástæðan var sú að þá hafði mörgum bókfræðifærslum verið eytt eða þær ógiltar (aðallega vegna sameiningar tvítekinna færslna) og því gaf eldri talning ekki nógu rétta mynd af titlafjöldanum lengur.

Heildarfjöldi útlána

Tölur yfir heildarfjölda skráðra útlána í Gegni, frá opnun hans 19. apríl 2003. Til útlána teljast bæði lán og endurlán.